SKILJUM (við) VERKINA:
Valdeflandi vinnustofa
Stutt og hnitmiðuð vinnustofa þar sem þátttakendur fá valdeflandi fræðslu, verkefni og verkfæri sem þau geta strax byrjað að vinna með í daglegu lífi.
Skiljum (við) verkina er valdeflandi og nærandi nálgun fyrir fólk sem býr við langvinna verki og hefur áhuga á að fræðast um samband heilans, taugakerfisins og verkja – og hvernig hægt er að virkja hugann til að endurmóta taugabrautir heilans og draga þannig úr eða jafnvel rjúfa þrálát verkjamynstur.
Yfirskriftin er orðaleikur sem vísar annars vegar til þess hve mikilvægt og valdeflandi það er að skilja hvað verkir og verkjaboð eru – og hins vegar til þess að hægt sé að skilja við verkina.
Markmiðið er ekki að lifa með verkjunum heldur að gjörbreyta sambandinu við þá og beita aðferðum, sem byggja á þekkingu um mótanleika heilans, til að brjóta upp langvinn verkjamynstur, draga úr óttaviðbragði í daglegu lífi og endurstilla bæði taugakerfið og hugarfarið.
Nálgunin byggir á gagnreyndum aðferðum Verkjaendurferlunar (Pain Reprocessing Therapy), jákvæðrar sálfræði, markþjálfunar og jóga.
Mikilvægt er að ítreka að allir verkir eru raunverulegir og eru ekki ‘bara í huganum’, en undirliggjandi orsök getur verið mismunandi.
*Aðferðirnar geta hjálpað með ýmiskonar heilsuvanda sem tengist taugakerfinu. Hér má sjá lista frá Pain Reprocessing Therapy Center yfir einkenni sem algengt er að séu taugamótuð. Ath. að flest þessi einkenni geta líka verið vegna kerfislægra sjúkdóma/structural disease processes. Hér er PDF skjal með þessum lista)
„Sóley og Edda eru með mjög þægilega nærvera, brosmildar og nærgætnar. Mæli svo sannarlega með vinnustofunni því að hún er nákvæm og fræðandi ásamt því að gefa tól og tæki til að halda áfram að vinna með þá hluti sem er farið yfir”
„Þessi vinnustofa vakti með mér von um að geta losnað við mígreni sem hefur fylgt mér síðan ég var barn. Leiðbeinendur skemmtilegir og komu efninu vel frá sér og það var gott að fá leiðbeiningar um hvernig sé hægt að vinna með þetta áfram.“
– Eyja Margrét Jóhönnu Brynjarsdóttir
Opnar augun fyrir nýjum veruleika. Þið sýndu hvernig hægt er að hafa áhrif á hugsanir og verki. Deilduð ykkar reynslusögum sem hefur alltaf áhrif . Þið eru með góða nærveru og myndið gott traust.
– Sif Beckers
Hér má hlusta á útvarpsviðtöl við okkur bæði í þættinum Reykjavík síðdegis á Bylgjunni, Í bítið á Bylgjunni og í Mannlega þættinum á RÚV – og blaðaviðtal á vísi.is.
Hér má lesa grein sem fjallar um nálgun okkar. Smelltu á myndina til að lesa greinina.
Sóley Stefáns
Sigrúnardóttir
Sóley er grafískur hönnuður, heilsumarkþjálfi, jógakennari og PRT meðferðaraðili (Pain Reprocessing Therapy). Hún er með BA í guðfræði og kynjafræði og MA diplóma jákvæðri sálfræði við HÍ.
Heilsan hefur lengi verið mér áskorun og undanfarin ár hef ég lagt stund á ýmiskonar heilsutengd fræði í leit að leiðum til að endurheimta heilsuna og byggja hana upp. Ég hef reynt á eigin skinni hvaða umbreytingu er hægt að ná með þekkingu á líkamanum, hugarvinnu og nærandi lífsstíl.
Ég hef lengst af starfað sem grafískur hönnuður en nú nýti ég sköpunarkraftinn í að styðja fólk við að hanna sína vegferð í átt að bættri heilsu og velsæld í lífinu.
Edda Björk
Pétursdóttir
Edda er markþjálfi frá Gothia Akademi í Svíþjóð, jógakennari og PRT meðferðaraðili (Pain Reprocessing Therapy). Hún er með BA í félagsfræði og MA diplóma í jákvæðri sálfræði við HÍ.
Í kjölfar veikinda og áfalla dreymir mig um að tengja saman jákvæða sálfræði við markþjálfun og jóga og skapa þannig uppbyggilegan vettvang til að bæta vellíðan og heilsu fólks.
Mitt markmið er að hjálpa fólki að lifa innihaldsríku og skapandi lífi og vekja fólk til umhugsunar hvað það er í raun sem skiptir mestu máli. Allt þetta hefur hjálpað mér að móta hugmyndir mínar, bæði þegar kemur að persónulegri framþróun, þroska og mögulegri nýsköpun.
Einnig er hægt að panta vinnustofu eða fyrirlestur t.d. fyrir hópa eða vinnustaði. Ef þú hefur áhuga, skrifaðu okkur póst og við verðum í sambandi.