Ég ákvað svo að fara í nám í heilsumarkþjálfun, bæði til að halda áfram minni leit, en fannst það líka vera áhugaverður starfsvettvangur. Í heilsumarkþjálfun er fjallað um heilsuna á heildrænan hátt og unnið einstaklingsmiðað við að styðja fólk til að finna sína leið til heilsu. Litið er heildrænt á næringu; góður matur er mjög mikilvæg næring, en þættir eins og hlátur og félagslíf eru líka lífsnauðsynleg næring. Aðalmálið er að styðja hverja manneskju til að finna sína eigin leið til að nærast vel. Þetta var frábært nám og ég lærði margt. 

Lykillinn að mínum bata kom svo í kjölfar þess, þegar ég kynnast aðferðum þar sem unnið er út frá heila- og taugavísindum og þekkingunni um mótanleika heilans (neuroplasticity) og svokölluð taugamótuð einkenni (neuroplastic pain/symptoms). 
Þessi þekking varpar ljósi á hvernig undirrót langvinnra verkja og ýmissa annarra einkenna getur legið í heila og taugakerfi og í raun í fölskum boðum heilans um hættu. Taugamótuð einkenni eru jafn raunveruleg og einkenni sem koma vegna einhverskonar vefjaskemmda eða skaða, en aðferðirnar til að meðhöndla þau eru gjörólíkar. 
Eftir áralanga vinnu við að halda verkjum og einkennum niðri með því að meðhöndla þau svæði sem einkennin komu fram á, bæði með meðferðum, æfingum og ströngu mataræði, lærði ég aðferðir til að endurmóta viðbrögð heilans við áreiti og endurstilla taugakerfið. Þannig náði ég að brjóta upp mynstur sem viðhéldu verkjum, mataróþoli og iðraólgu, áfallaröskun og fleiru.
Þarna fann ég rót minna einkenna og svarið við því af hverju verkir og einkenni héldu áfram þrátt fyrir allar mína vinnu. 

Fyrsta námskeiðið sem opnaði augu mín fyrir þessari nálgun kallast DNRS og var mér ómetanlegt. En eftir það hefur þessi nálgun átt hug minn allan og ein af þeim aðferðum sem hefur nýst mér frábærlega og heldur áfram að nýtast mér kallast Pain Reprocessing Therapy eða (PRT Verkjaendurferlun) og ég bætti við mig PRT námi og býð uppá þá meðferð, sjá nánar hér.

Ég vildi dýpka þekkingu mína enn frekar á þessu sviði og fór í frábært nám í jákvæðri sálfræði við EHÍ og lauk MA diplómagráðu. Í hnotskurn fjallar jákvæð sálfræði um að rannsaka hvað einkenni gott og hamingjuríkt líf og hvað þurfi til að fólk blómstri og búi við vellíðan. Sjónum er beint að styrkleikum og því sem er ‘rétt’ við okkur, frekar en veikleikum og því sem er ‘að’ okkur. Unnið er út frá þekkingu taugavísindanna og lífeðlisfræðinnar um mótanleika heilans og getu okkar til að hafa áhrif á líf okkar. Eitt af því sem jákvæð sálfræði hefur lagt til eru svokölluð jákvæð inngrip. Það eru inngrip eða einhverskonar ástundun sem rannsóknir hafa sýnt að virka til að bæta heilsu og vellíðan. Eitt af þeim inngripum sem mest hefur verið rannsakað eru þakklætisæfingar, þær sýna greinileg áhrif á líðan, en inngripin eru fjöldamörg og fjölbreytt.

Öndun er eitt af okkar öflugustu leiðum til að hafa áhrif á taugakerfið og ég hef verið heilluð af öndun alveg síðan ég byrjaði að læra jóga. En eftir lestur bókarinn Andardráttur ákvað ég að kafa dýpra í þau fræði og tók námskeið í meðvitaðri öndun, Conscious Breathing hjá Anders Olson, til að dýpka skilning minn á lífeðlisfræði öndunar og leiðum til að þjálfa bætta öndun í daglegu lífi.