Þegar verkir (og ýmis önnur heilsufarseinkenni) hafa verið til staðar í meira en 3-6 mánuði er talað um langvinna verki. Ef engin greinanleg orsök er fyrir þeim (önnur en t.d. slit á segulómmyndum) eru auknar líkur á að einkennin séu taugamótuð (neuroplastic). 

Taugavísindin hafa sýnt fram á að allir verkir eiga sér uppruna í heilanum. Heilinn metur boð frá skynfrumum líkamans og sendir verki til að vara við hættu ef hann telur ástæðu til. Yfirleitt er þetta frábær eiginleiki heilans og okkur lífsnauðsynlegur til að varast hættum og lifa af.

Vandinn er þó sá að heilinn hefur ekki alltaf rétt fyrir sér, hann vinnur hratt og dæmir út frá fyrri reynslu – og stundum getur hann túlkað örugg boð frá skynfrumum líkamans eins og þau séu hættuleg og sent verkjaboð til viðvörunar – þó engin hætta sé til staðar. Verkir eru flókið og áhugavert fyrirbæri – og við vitum að samspil líkamlegra, sálrænna og félagslegra þátta hefur áhrif á birtingarmynd þeirra.

Mikilvægt er að hafa í huga að slík verkjaboð eru alveg jafn sársaukafull og verkjaboð þar sem líkamleg orsök er til staðar, þetta eru jafn  raunveruleg verkjaboð og hver önnur. Eitt skýrasta dæmið um þetta eru verkir í útlimum sem fólk hefur misst (phantom limb pain), sársaukabrautirnar eru enn virkar í heilanum þrátt fyrir að sársaukasvæðið sé ekki lengur til. 

Pain Reprocessing Therapy aðferðin getur skipt sköpum þegar um taugamótaðan verk eða einkenni er að ræða.  Rannsókn sem gerð var á PRT meðferð með fólki sem átti við þráláta bakverki sýndi að 66% þátttakenda losnuðu alveg, eða nánast alveg við verkina og 98% fundu fyrir einhverjum bata. 

PRT aðferðin snýst í grunninn um að endurþjálfa viðbrögð þín við verkjunum/einkennunum, endurstilla varnarkerfi heilans, þannig að óþörf verkjaboð minnki, fjari út og jafnvel stoppi alveg. Í byrjun er fræðsla og skilningur og verkjamynstri hvers og eins mikilvægur og að gengið hafi verið úr skuggu um að verkirnir eða einkennin séu ekki að vara við ógn eins og sýkingu, æxli eða beinbroti.

Ásamt PRT nýtum við verkfæri heilsumarkþjálfunar og jákvæðrar sálfræði og beinum sjónum að styrkleikum þínum og gildum, eflingu jákvæðra tilfinninga, flæðisupplifana og þess sem veitir þér hamingju. Eftir því sem passar þér og þinni heilsuvegferð.